Ostirala, 2020ko azaroak 27
Gora joan
Menua

Jakin 219: Nazioak, estatugintzak, kulturak eta subiranotasunak jositako artikuluak

Urteroko artikulu solteen zenbakia da Jakinen 219. aldizkaria, eta Iñaki Zabaleta Gorrotxategi, Iñaki Lasagabaster, Haritz Azurmendi, eta Julen Zabalo eta Onintza Odriozolaren artikuluek osatzen dute

2017-05-09

Jakinen 219. zenbakia urteroko artikulu solteen zenbakia da, baina nahi gabean  ‘monografikoa’ bihurtu da. Nahi gabean bai, baina ez kasualitatez. Nazioa, nazionalismoa, estatua, estatugintza, hizkuntza, kultura, demokrazia eta subiranotasuna kontzeptuen inguruan jarduten baitute aldizkariak jasotzen dituen lau artikuluek. Eta hori ez da kasualitatea, une honetan eztabaidagai ditugun gaien isla direlako laurak. Bakoitza bere ertzetik, baina ziri berean metatuta: Humboldt antropologo alemaniarraren Euskal Herriko bidaiari heldu dio Iñaki Zabaleta Gorrotxategi EHUko filosofia irakasleak; Haritz Azurmendi filosofia lizentziadunak nazioaren eta estatuaren harremanaz hausnartu du; Julen Zabalo eta Onintza Odriozola EHUko irakasleek nazioaz eta demokraziaz aritu dira; eta Iñaki Lasagabaster EHUko administrazio zuzenbideko katedradunak Hego Euskal Herriko administrazioak aztertu ditu, autogobernuaz, subiranotasunaz nahiz eskumenen garapenaz hitz egiteko, besteak beste. Bakoitza bere esparrutik, baina  elkarrizketan. Nahi gabean, baina ez kasualitatez.

Generoa aztergai, uztailaren 31 arte zabalik Martin Ugalde beka

Egunkaria eta Berria euskarazko egunkariek genero gaietan izan duten eragina ikertzeko bide emango du. Irabazleak 8.000 euroko dirusaria jasoko du

2017-05-09

Martin Ugalde kultur parkeak, Berria Fundazioak, Elkar Fundazioak eta Jakin Fundazioak, Andoaingo Udalaren laguntzarekin, Martin Ugalde bekaren deialdi berria egin dute 2017rako. Bekak bi gairen gaineko ikerketa egiteko aukera ematen du bi urtean behin: Martin Ugalde bera ikertzeko aukera, eta euskal kazetaritzaren gaineko ikerketak egiteko aukera. Aurtengo gaiak Egunkaria eta Berria euskarazko egunkariek genero gaietan izan duten eragina ikertzeko bide emango du. Proiektu aukeratuak 8.000 euroko dirusaria jasoko du, eta urtebete izango du irabazleak proiektua garatzeko. Lana idatzizkoa nahiz ikus-entzunezkoa izan liteke. Proiektuak aurkezteko epea uztailaren 31 arte izanen da zabalik.

2017-04-21

Liburuaren egunaren karietara, euskarazko liburuaren argazkia ekarri du gogora Jakinen Liburu Behatokiak. 2016ko datuen faltan, ekoizpena errekuperatzeko bidean dela pentsa liteke, 2015ean %8 hazi baitzen euskal liburugintza, mende berriko daturik onenetakoa erdietsiz. Euskarazko liburuaren bizitzak, ordea, laburra izaten jarraitzen du, eta hezkuntza eta irakaskuntza arloko liburuek bereganatzen dute ia ekoizpenaren erdia, %42. Gainera, hezkuntza eta irakaskuntza arloko liburuen 10etik 6 kanpoko argitaletxeek ekoizten dituzte. Datu kezkagarria, hezkuntza proiektu gehienak kanpoan diseinatzen direla ondoriozta liteke-eta, horrek dakartzan ondorio guztiekin.

Jakinen inguruko lau ikus-entzunezko osatuko dituzte EHUko ikasleek

Jakinlarien historia, abertzaletasuna, nazioa eta estatugintza, eta emakumeak eta literatura gaiak landuko dituzte

2017-04-19

EHUko Ikus-entzunezko Beatriz Zabalondo irakaslearen lau ikaslek Jakin aukeratu dute gradu amaierako lana egiteko. Jakinen historian nahiz aldizkarian izandako eztabaidetan sakonduko dute, eta bakoitzak ikus-entzunezko bana osatuko du: Itsaso Garin ikasleak Joseba Intxausti, Joxe Azurmendi, Joan Mari Torrealdai eta Paulo Agirrebaltzategi jakinlarien inguruko pieza osatuko du, eta elkarrizketak egiten hasi da horretarako; Olatz Lasa ikasleak, berriz, Abertzaletasuna lehen eta orain: nola bizi dute belaunaldi desberdinek ikus-entzunezkoa egingo du; Leire Ikaran ikasleak, bestalde, emakumeak eta literatura gaia landuko du 1987an Jakinen argitaratutako izen bereko monografikoa abiapuntu hartuta; eta, azkenik, Peru Arrasate ikasleak Naziogintzatik estatugintzara izenburupean landuko du gradu amaierako lana.

Jakinen XX. eta XXI. mendeetako euskal pentsamenduaren transmisioa proiektuak jaso du 2017ko Elkar Saria

Txillardegiren lana hedatzeko ikus-entzunezkoak, liburuak eta web orrialde propioa osatuko ditu Jakinek

2017-04-05
Lorea Agirre Jakineko zuzendaria, Jone Forcada Txillardegiren alarguna, eta Joxemari Sors Elkar Fundazioko burua

Euskal pentsamenduaren transmisioa sustatzeko XX. eta XXI. mendeetako euskal pentsamenduaren transmisioa proiektua jarriko du martxan Jakinek 2017ko Elkar Sariari esker. Proiektuaren lehen urratsa Txillardegiren obra ezagutzera ematea izango da. 10.000 euroko diru laguntza jasoko du horretarako Jakinek sariarekin, eta Txillardegiren inguruko liburu bilduma, ikus-entzunezko laburrak, eta haren obra digitalizatuarekin web atari berezia osatuko ditu Jakinek.

Apirilaren 8ko ETAren armagabetzearen atarian, indarkeriaz egindako gogoetak

Jakinen indarkeriaz egindako hainbat gogoeta jaso ditugu dosierrean

2017-04-05

«Oso erraza da Aieten esatea ETAk armak bota behar dituela. Botako ditu. 200 kalashnikov nahi badituzu, emadazu aste bat eta lortuko dizkizut, azkar. Merke, gainera». Hala zioen Ramon Labaien politikari jeltzaleak 2013an, Imanol Murua kazetariak Jakin aldizkariko Historia bizia sailerako egindako elkarrizketan. «Zertan bukatuko den? Ez dakit». 2017ko apirilaren 8an izango du erantzuna Labaienen galderak. Ezusterik ezean, egun horretan armagabetuko da ETA, bakearen artisauak bitartekari dituela. Bake prozesuan mugarri izango den eguna.  Horregatik, Jakin aldizkarian ETAren nahiz oro har gatazkaren eta indarkeriaren inguruan idatzitakoak ekarri nahi izan ditugu ostera ere mahai gainera dosierrarekin. Ez guztiak, baina bai esanguratsuetako batzuk. Baita Jakinkideen hitz batzuk ere. Hemen dosierrerako lotura zuzenean.