Osteguna, 2024ko martxoak 28
Gora joan
Menua

{PODCAST} Xabier Leteren trantsizioko poetikak

Alexander Gurrutxagak Leteren poetikaz Jakinen egindako hausnarketa jasotzen du erreportajeak

2021-04-30

Xabier Leteri egin dakiokeen «omenaldi onena ikerketa, eztabaida eta transmisioa» dela sinetsita ari da Alexander Gurrutxaga ikerketa eta dibulgazio lanetan. Jakin aldizkariaren 242. zenbakian, Leteren trantsizio garaiko poetikak aztertu ditu. Bere hipotesiaren arabera, trantsizio osteko garaiko «jarrera eta ildo estetikoak trantsizio garaiko zauriak sendatzen saiatzeko erantzunak» izan litezke. Artikuluan eztabaidarako bidea irekitzen du, bere garaian traiziotzat jo ziren jokabideen inguruan.

Horri buruz jardun du Oihana Iguaran Barandiaran kazetariarekin, Euskadi Irratiko Jakingunerako egindako erreportajean.

LOKATZA podcasta

pentsamendu feministan narrasean

2021-04-30

Jakinek talde lanean ekoitzitako podcasta da LOKATZA. Hainbat auzi pentsamendu feministaren argitan aztertzeko saiakera honek zortzi atal izango ditu orotara. Ahotsaren, epikaren desioaren eta etxearen eta bidaiaren ingurukoak entzungai daude dagoeneko eta gainerakoak bi astez behin egingo dira publiko EiTB podkast atarian. Lokatzetara ekarriko diren hurrengo auziak gatazka, sormena eta boterea dira. Lorea Agirre, Ainara Lasa, Amagoia Gurrutxaga eta Idurre Eskisabel aritu dira zuzendaritza eta diseinu lanetan, baina askoz sare zabalagoa du proiektuak oinarrian: Maite Arroitajauregi Mursego-ren sintonia (Lourdes Iriondoren Hala ere kantutik abiatuta), Leire eta Maider trikitilarien berariazko musika aukeraketa, gai bakoitzari bidea irekitzeko zein ixteko testuetan kolaboratzaileak, eta 30etik gora elkarrizketatu.

2021-02-22

Pilare Baraiazarra irakasle eta euskaltzalea elkarrizketatu du Miren Rubio Iturria kazetariak, Jakinen Historia bizia sailean: Donostiako Santo Tomas Lizeoko eta Gros auzoko pisuko bizipenak; euskal filologia eta irakasletza ikasketak; 70etako Bilboko giro militantea: euskal kontzientziaren eta langile kontzientziaren sakontzea; materialgintza eta didaktikaren berrikuntzan egindako ekarpena; D ereduaren aldeko lana Bizkaiko Ezkerraldeko eskola publikoan... Bestetik, Alexander Gurrutxaga Muxika EHUko irakasleak Xabier Leteri buruz idatzi du artikulua, Leteren trantsizio garaiko sorkuntza aztertzeko.

[PODCAST] Kultura, autoestimua eta konplexuak

Katixa Agirrek kulturaz Jakinen egindako hausnarketa jasotzen du erreportajeak

2021-02-17

«Autoestimu maila oso altua behar du gizarte batek kultura seriotan hartzen hasteko. Eta sentitzen dut hala esatea, baina ez dugu autoestimua sobran». Pandemiak astindutako kultur munduaren ondorenaz hausnartu du Katixa Agirre idazleak: kulturaren balioaz, lekuaz, kultur profesionalen egoeraz, autopertzepzioaz, aukerez... Eta mugak eta zailtasunak franko badira ere, autoestimu hori indartzeko arrazoiak ere topatu ditu. 2020ko ikus-entzunezkoen produkzio emankorra da horren adibide, estrategikotzat dituena: «Kontatzen ez bazara, kontatzen zaituzte. Horregatik geure burua kontatzen jarraitu behar dugu, edozein bide erabilita, baina bereziki gaur egungo espresiobide hegemonikoan arreta estrategikoa jarriz. Ikus-entzunezkoaz ari naiz, noski». Horri buruz jardun du Miren Rubio Iturria kazetariak egin duen laburpenean. Entzun!

[PODCAST] Euskal liburugintzari argazkia, Torrealdairi lekukoa hartuta

Torrealdairen ikerketari jarraipena eman dio Jakinek. 2018ko datuak plazaratu ditu oraingoan.

2021-01-25

1976an Joan Mari Torrealdaik hasitako euskarazko liburugintzaren ikerketari bide eman dio Jakinek. Xabier Eizagirre Jakineko erredakzio buruak hartu du urtez urteko ekoizpena aztertzeko ardura, eta, oraingoan, 2018ko euskarazko liburugintzaren argazkia osatu du, Torrealdairen azken urteetako osasun arazoek atzeratu baitzuten ikerketaren emaria.

Bi urteko tartea izanagatik, ordea, datu aski mamitsu eta deigarriak jaso ditu azterketak: liburu digitalaren beherakada, argitaletxeen atomizazioa, Euskal Herritik kanpoko euskarazko testuliburuen ekoizpena… Horiei buruz mintzatu da Eizagirre Miren Rubio kazetariarekin, Euskadi Irratiko Jakingunea podcasterako. Datu guztiak zabal daude jasota Jakinen Liburu Behatokian. Entzun erreportajea!