Bertsolaritzari buruzko gogoeta dakar zenbaki monografikoak, baina bertsolaritza gizartearen isla izanik, bertsoaz haragoko hausnarketa du muinean. Bertsolaritzari begiratzeko kultur ikasketak eta pentsamendu feminista baliatuta, Lorea Agirre Jakineko zuzendariak zenbakiaren sarreran dioen gisan: «araua, normatibitatea, hegemonia, subalternitatea, botere harreman eta hierarkiak, neutraltasun eza, feminizazioa, generoa, sinesgarritasuna, egiantzekotasuna, markoa, muga, arrakala, eraldaketa, iraulketa» dira lantzen diren gaiak, bertsotik abiatuta. Bertso munduko lau kideren artikuluak biltzen ditu monografikoak, bertsotan jarduten diren Miren Artetxe, Irati Majuelo eta Oihana Arana batetik, eta Ainhoa Urien gai-jartzailea bestetik. Era berean, artikuluetan Sustrai Colina eta Nerea Ibarzabalen ahotsak presente daude, Maite Berriozabal gai-jartzailearenak bezalaxe.

Txoria hodei artean. ETB lehen eta gero liburu berriaz (Aleka) aritu gara Urtzi Urkizu egilearekin. Kazetari eta idazleak 35 aditu eta aritu elkarrizketatuta, ETBren ibilbidearen errepaso mamitsua osatu du eta zenbait gako aletu dizkigu Euskadi irratiko zein Radio Euskadiko Jakingunerako egindako elkarrizketan.

Hekimenek, herri ekimeneko euskarazko komunikabideak biltzen dituen elkarteak, urteroko batzarra egin du martxoaren lehenean Martin Ugalde Kultur Parkean. Urteko egitasmoa adosteaz gain, sektorearen egoerari buruz gogoeta egiteko baliatu dugu hitzordua kideok. Eta administrazioari zuzendutako adierazpen bateratua aurkeztu dugu.

Lokatza podcastak jendaurreko zuzeneko atala eskaini du Loraldia Festibalaren eskutik, martxoaren 10ean. Harrera aparta izan du Hiria lokatzetan jarri duen saioak.
Laster jarriko dugu sarean ikusgai bideo osoa.

Joan Mari Torrealdai Beka eskuratu duen proiektuaren emaitza edo ekintza eszenikoa, dokumentua, performancea eta antzerkiaren mugetan mugitzen den lana eskainiko du Metrokoadroka Kolektiboak martxoaren 12an Arriaga Antzokian, 19:30ean. Loraldia festibalaren baitan emango dute ikuskizuna eta sarrerak sarean eskura daitezke.

Aurretik, Lorea Agirrek testuingurua eskainiko dio ikuskizunari 18:30ean Foyer-ean egingo den Ikusletegian. Joan Mari Torrealdai nor zen eta Artxibo biluzia proiektu eta ikuskizuna nondik abiatzen den ezagutzeko aukera ezin hobea.

Hiria lokatzetan jarriko dute Lokatza podcastaren egileek, lehen aldiz zuzenean eta jendearen aurrean. Hiria zeren gainean eta zeinen bizkar eraikitzen den pentsatzeko proposamen hausnartzaile eta sormenezkoa izango da. Parte hartzaileak Lokatza podcastaren sortzaile Ainara Lasa, Amagoia Gurrutxaga, Idurre Eskisabel eta Lorea Agirre izango dira, eta eurekin Miren Amuriza, Miren Narbaiza eta Lizar Begoña ariko dira hiria lokazten.