Gazteen eguneroko kezka eta galderetatik abiatuta, gazteekin euskaraz eta euskaratik, feminismoa, soziolinguistika, kultura eta pentsamendua lantzen duen ikus-entzunezko sorta da Geruzak. Baina baliabide digital hutsetik harago, pentsamendu kritiko eta autonomorako espazio bat sortzea bilatzen du, ikus-entzunezkoen bitartez eta material osagarrien laguntzaz eztabaida eta kultur transmisioa bultzatu nahi dituena. Horregatik, material hori baliatuz gazteak biltzen diren topaguneak pentsamendu kritikoa euskaraz lantzeko baliatzen ari gara. Irailetik aurrera, ikastetxeek ere eskuragarri izango dute bisita antolatzeko aukera, kaixo@geruzak.eus helbidera idatzita.

Lau artikulu akademiko biltzen ditu 262. zenbakiak, LGTB* politiken analisia, Ipar Euskal Herriko euskarazko zinemagintza, nerabeen hizkuntza erabilera eta Euskal Herriko beste hizkuntza minorizatuen erronkak aztertuz. Lorea Agirre zuzendariak hitzaurrean nabarmendu bezala, ordea, bat egiten dute «emantzipazio edota normalizazio prozesuez, gutxituen ahalduntzeaz» ari direlako. Denek ala denek bistaratzen dituzte erronka eta zailtasunak, baina bakoitzari dario irtenbidea marrazteko mezurik: LGTB* politiketatik gainerako gizarte mugimenduek har ditzaketen irakaspenak, Ipar Euskal Herriko euskarazko zinemagintza sustatzeko sortu den Zukugailua elkartea, nerabeen hizkuntza erabilera «helduon auzia» dela bistaratzea eta hizkuntza-komunitate minorizatuen arteko aliantzak azpimarratzea.

56ko belaunaldia, Jakin Taldea eta Joxe Azurmendi ikastaroa egingo da uztailaren 29 eta 30ean Donostiako Carlos Santamaria zentroan, eta "Euskal Herriaren bilakaeran esanahi berezia izan duen garaia" landuko da bertan.

Lehen edizioko proiektu irabazleak Joan Mari Torrealdairen atxiloketa eta miaketa unean desagerrarazitako artxiboa du abiapuntu. Metrokoadroka kolektiboko Idoia Beratarbide eta Oier Guillan artxibo hutsaren aurrean kokatu dira azken bi urteotan, zerekin bete nahiko lukeen galdetzeko aurrean duenari.

Joan Mari Torrealdai beka kultur ikerketak eta egitasmoak sustatzeko sortu da, bereziki Joan Mari Torrealdaik jorratu izan dituen esparru nagusietan. 2024ko bigarren edizio honetan, Jakin Fundazioak eta Usurbilgo Udalak deialdia egin dute hemen zehazten diren oinarriekin:

Joan Mari Torrealdai bekaren 2. edizioak euskal kulturaren azterketari helduko dio. Proiektuak urriaren 21era bitarte aurkeztu ahalko dira, eta 14.000 € eskuratuko ditu irabazleak. Proiektuak jmtbeka@jakin.eus helbidera bidaliko dira.

OINARRIAK