'Hiria lokatzetan' podcasta zuzenean, martxoaren 10ean Loraldian

Hiria lokatzetan jarriko dute Lokatza podcastaren egileek, lehen aldiz zuzenean eta jendearen aurrean. Martxoaren 10ean izango da hitzordua, Loraldia festibalaren baitan 12:30ean Guggenheim Bilbao museoko Entzungelan. Hiria zeren gainean eta zeinen bizkar eraikitzen den pentsatzeko proposamen hausnartzaile eta sormenezkoa izango da. Parte hartzaileak Lokatza podcastaren sortzaile Ainara Lasa, Amagoia Gurrutxaga, Idurre Eskisabel eta Lorea Agirre izango dira, eta eurekin Miren Amuriza, Miren Narbaiza eta Lizar Begoña ariko dira hiria lokazten.

Hiriak badu lokatza, asfaltoaren azpian: porlana, jendeak, hizkuntzak... nori egiten dion leku eta nor egotzi, horixe izango dute pentsagai eta mintzagai: «Dena ez da Gran Via, dena ez da katedral eta beirate eder. Mutututako jende gehiegi dago hemen...».

Sarean eskura daitezke sarrerak, Lorazain sarrerak 8 euroan eta Lorazain ez direnen sarrerak 10 euroren truke.