Larunbata, Igandea, 2017ko irailak 23
Gora joan

Hau iragarki bat da

2015-10-20

Interneteko zerbitzu handi askok bere negozio eredua publizitatean oinarritzen dute. Badakigun arren, publizitate mota horien barne informazio gutxi dugu orokorrean. Informazioa ez dago ezkutuan, baina publizitate hori erabili nahi dutenak dira normalean horri buruz dakiten bakarrak. Lerro hauetan, Google, Facebook eta Twitter zerbitzuen publizitate ereduen iragarkiak bideratzeko aukerak aztertuko ditugu.

Google (adwords.google.com) izan zen bere bilatzailearen bidez publizitate digitalaren aldaketa handiena ekarri zuena. Aurretik, bannerrak eta horien ‘inpresioetan’ oinarritutako publizitatea zen nagusi. Bilatzailea baliatuz, bilaketak kontuan hartuz, publizitate eredu berri bat jarri zuen abian orduan, bilaketak eta erabiltzailearen informazioa kontuan hartuta publizitatea hobeto bideratzen zuena.

Asko aldatu da Google; orain, bilaketetan ez ezik afiliatutako beste webguneetan, bideoetan eta baita mugikorretako aplikazioetan ere iragarkiak txertatzeko aukera ematen du. Denetan sakontzea baino, iragarki horiek beren helburuak bete ditzaten zein estrategia, aukera eta filtro ematen dituzten ikusiko dugu.

Iragarkiak bideratzeko filtro ezberdinak eskaintzen ditu Googlek; orokorrenak: kokapen geografikoa, hizkuntza, erabilitako gailuak eta, nola ez, gako hitzak. Gako hitzen bidez, bilaketa horiek edo antzekoak egiten dituztenei bideratzen zaie publizitatea.

Googlek duen datu kantitatea eta darabilen inteligentzia artifiziala baliatuz, aukera ematen du webgune mota bat edo afizio zehatz bat duten pertsonak zein diren identifikatu eta horiei publizitatea bideratzeko. Horrez gain, webgune bat –demagun, online denda bat– bisitatu eta produktu bat ikusi ondoren, iragarki hori beste webguneetan ere erakusteko gaitasuna dauka, behin eta berriz iragarkia erakutsita erosteko aukera gehiago baitaude.

Facebook (facebook.com/advertising) kanpainetan helburu ezberdinak zehaztu daitezke: mezuak promozionatu, jendea zure webgunera bideratu, aplikazio bat instalarazi, bideo erreprodukzioak lortu... Negozio fisiko bat izanez gero, negoziotik gertu dabiltzan pertsonei bideratu diezaiekezu publizitatea, pentsa.

Filtroak ere izugarriak dira; orokorrenak: kokapena, adina, generoa eta hizkuntza. Askoz zehatzagoak ere badaude: pertsonen zaletasunak, jarrerak eta konexioak. Hau da, iragarki bat bideratu ahalko diogu, adibidez, eskia gustatzen zaien, bidaiatzeko ohitura duten eta gainera eskiari buruzko aplikazio zehatz bat erabili duten pertsonei.

Balio demografiko oso zehatzen arabera ere mugatu daiteke: harremanak, hezkuntza, lana, gurasoak, politika, bizitza gertakariak... Adibidez, emakumezkoak diren, ezkonduta dauden, doktoretza bat duten, semeak dituzten eta laster bere bikotearekin 30 urte elkarrekin beteko dituzten pertsonei bideratu diezaiekegu publizitatea. AEBetan jarrera politikoa ere erabil daiteke filtro moduan, Facebookek hori ere badaki eta.

Bukatzeko, Twitterren (ads.twitter.com) ere mezuak promozionatu, jarraitzaile gehiago lortu, webgunera jendea bideratu, intereseko pertsonen posta zerrendak lortu edo aplikazio bat instalatzea lortu daiteke publizitatearekin.

Eskaintzen dituen filtroak, orokorrenak betikoak: kokapena, generoa, hizkuntza, gailuak eta baita erabiltzen dugun telefono konpainia ere. Hortik aurrera filtro oso zehatzak ditu, horietako bat Twitterren pertsona zehatz bat jarraitzen dutenak eta antzekotasunak dituztenak aukeratzen dituen bat, adibidez.

Besteetan bezala, interesak, gako hitzak, jarrerak... filtro bezala zehaztu daitezke. Harrigarria, adibidez, jarreretan eskaintzen duen aukera aniztasuna, etxean jasotzen den diru kopurua edota kirol zehatz batekiko interesa tarteko.

Hala ere, ezberdintasun handiena, kasu honetan, Twitterrek telebistarekin duen harremanean dago. Telebista programa askoren audientzia neurgailu ere bihurtu da Twitter; horregatik, beharbada, erabiltzaileek jarraitzen dituzten telesailen bidezko filtroa ere eskaintzen du.

Hori posible egiten dugunak geu gara, ez dugu ahaztu behar. Doan eskaintzen zaiguna ez da doan, noski; gure datu eta informazioarekin ordaintzen dugu zerbitzua. Baliotsuak diren seinale, ez gutxietsi.