Argitxu Noblia Richard mediku eta Seaskako sortzailearen bizipenak jaso ditu Jakinen 224. zenbakiak. Amagoia Gurrutxaga Uranga kazetariak elkarrizketatu du. Horri josiz, Xan Aire Seaskako Hizkuntza Proiektuaren koordinatzaileak Seaskako erronkei buruz osatu du artikulua.
Jakineko emakume langileok martxoaren 8rako deitutako grebarekin bat egitea erabaki dugu. Hori dela eta, egun osoko lanuztea egingo dugu. #M8 #EmakumeokPlanto
Egungo emakume artista belaunaldi oso bat galtzeko arriskuan gara. Hala dio Haizea Barcenilla arte historiatzaileak. Bilboko Okela Sormen laborategiko arduradunekin ere hitz egin dugu Euskadi Irratirako Jakinek osatutako erreportajean.
UEU, Gasteizko Oihaneder Euskararen Etxea eta Jakin elkar hartuta datoz ‘Euskaltzaletasuna eta feminismoa: zer ikasi, hura elikatu’ ikastaroa eskaintzeko. Elkarguneko feminismotik, hizkuntzari eta generoaren gurutzaketari propio erreparatuko dio urtarriletik maiatzera bitarte egingo diren lau hitzaldi eta mahai-inguruarekin.
Joxan Artze, iturri zaharretik ur berria isurtzen jardun duen poeta, txalapartaria eta Ez Dok Amairuko sortzailea hil da (Usurbil, 1939 - ib. 2018). Tradizioa eta esperimentazioa uztartzen aitzindari, 1977an Jakinen esandakoek agerian uzten dute Artzeren emari oparoa. Hitz horiek jaso nahi izan ditugu eskertza gisa.
2017ak eman duenak balio du hasi berri dugun urteari begiratzeko. Erronkak zehazteko. Horregatik, euskal kulturaren urteko balantzea egiteko eskatu die Jakinek Olatz Beobide, Miren Rubio, Itziar Ugarte Irizar, Jon Eskisabel, Kattalin Miner, Galder Perez, Iratxe Retolaza, Maialen Goñi eta Xabier Landabideari. Gainera, urtea irudietara ere ekarri dute Adur, Aritz Irigoien, Axpi Ilustrazioa, Exprai, Diego Pallés eta Patxi Gallego marrazkilariek.
