Emakume eta gizonen arteko desberdintasun sozialen erroetara jo zuen Carole Pateman politologo feminista britainiarrak The Sexual Contract saiakeran. 1988an argitaratua, emakumeen gorputza menperatzeko dagoen gizarteko hitzarmen patriarkala azaleratzen du liburuak. Jean-Jacques Rousseau pentsalariak izendatutako kontratu sozialaren oinarrian itun sexual-soziala baitago, egilearen hitzetan. Maialen Berasategi Catalán itzultzaileak ekarri du euskarara Eskafandra bildumarako.

Utopia 68/18. Iruditeria berrien bila Jakin Jardunaldian eztabaidatutakoa dakar orain osatuta Jakinen 227-228. zenbaki bikoitzak: utopiaren esanahiaren aldaketa aztertu dute Alba Garmendia EHUko filosofian doktoregaiak eta Eduardo Apodaka EHUko irakasle eta soziologoak; Elixabete Garmendia Lasa kazetariak Euskal Herriko 60ko utopiei erreparatu die; zaintzari eta sozioekologiari buruz osatu dute artikulua Uzuri Aboitiz Hidalgo antropologian doktoregaiak, Iñaki Barcena EHUko irakasleak eta Anaiz Agirre eta Xabier Harluxet Bizi! mugimenduko kideek; bizipen zehatzak ere gerturatzeko jaso ditugu Amaia Lasa idazleari, Begoña Zearreta adinekoen egoitzetako langileari eta Begoña Huarte ekintzaileari egindako elkarrizketak.

Francoren diktaduraren osteko lehen lehendakaria izan zen Carlos Garaikoetxea. Enpresa munduan eta Nafarroako ikastolen aldeko mugimenduan buru-belarri ibilia zen ordurako. Lehen legealdia gogorra bezain oparoa izan zela gogoan du Garaikoetxeak, dena hutsetik hasi behar zuen gobernuko buru izaki. Bigarren legealdia ezin izan zuen amaitu, ordea; EAJren baitan sortutako krisiagatik dimisioa aurkeztu zuen, eta EA alderdiko hautetsi eta presidente gisa jarraitu zuen politikagintzan.

Bere ibilbideaz luze bezain zabal aritu da solasean Garaikoetxearekin Elixabete Garmendia Lasa kazetaria. Politikari gisa emandako urteez gain, bere senide, zaletasun eta kezkei buruz ere galdetu dio. Solasaldi horien emaitza da elkarrizketa liburu hau: Carlos Garaikoetxea. Lider bat lehendakari.

Lehendakaria gertutik ezagututako zortzi lagunen hitzekin osatu du elkarrizketa: Mirentxu Purroy eta Charo Zarzalejos kazetariak, Pedro Miguel Etxenike fisikari eta lehen Jaurlaritzako Kultura sailburua, Ignacio del Burgo, Patxi Zabaleta eta Koldo Amezketa politikariak, Mari Carmen Garmendia ekonomilaria eta lehen Jaurlaritzako Hezkuntza sailburua, eta Maritxu Uria, Imanol Murua Zarauzko alkate eta Gipuzkoako diputatu nagusi izandakoaren emaztea. Horiek guztiek esandakoekin jaso du Garmendia Lasa kazetariak Carlos Garaikoetxearen lekukotza.

Jakinek eta euskara batuak elkarrekin egin dute bidea aldizkariaren sorreratik bertatik. Horregatik, euskara batuaren 50. urteurrenean ere, bat hartuta izan dira: Euskaltzaindiak Joan Mari Torrealdai euskaltzain eta Jakin Fundazioko lehendakariari eman dio euskara batuaren adierazpena idatzi eta irakurtzeko enkargua, akademiaren XVII. Biltzarraren amaierako ekitaldian.

68ko Maiatzetik mende erdia pasa dela eta, bederatzi aditu eta aritu elkartu ditu 'Utopia 68/18. Iruditeria berrien bila' Jakin Jardunaldiak uztailaren 12 eta 13an Usurbilen, UEUren ikastaroen baitan. Hitzaldi guztiak dituzu ikusgai Berria egunkariaren eskutik.

Hizkuntzaren eta generoaren arteko gurutzaketaz jarduteko osatu dugu 'Euskaltzaletasuna eta Feminismoa: zer ikasi, hura elikatu' ikastaroa UEUk, Oihaneder Euskararen Etxeak eta Jakinek elkarlanean. Hilean behin gonbidatu dugu adituren bat Gasteizko Oihanederren egoitzara eta bertan eskainitako hitzaldi eta mahai-inguruak dituzu orain ikusentzunezko bihurtuta. Bost guztira, honako adituekin: Mari Luz Esteban, Miren Artetxe, Amelia Barquín, Lorea Agirre, Idurre Eskisabel, Ane Labaka, Jaime Altuna eta Aizpea Otaegi. Guztien bideoak ikusteko sartu albistean.