Osteguna, 2020ko irailak 24
Gora joan
Menua

Joan Mari Torrealdairen azken esker hitzak: «Harro nago eraikitakoaz»

Andanaka herritar eta euskaltzalek eman diote azken agurra Usurbilen Joan Mari Torrealdairi. Familiak ere eskerrak eman nahi dizkie gerturatutakoei

2020-08-03

«Bakean joan naiz familiak inguratuta, bizitzak eman didan guztiari eskertuta». Esker hitz horiekin hasten da Joan Mari Torrealdaik berak utzitako hil ondorengo agur mezua. Andanaka herritar eta euskaltzale elkartu ziren Usurbilgo elizan Torrealdairi azken agurra emateko, eta elizkizunean bertan irakurri zuen alabak Torrealdaik idatzitako agurra. «Ezin izan zaituztet zuek guztiok banan-banan agurtu, baina badakit ulertu eta barkatuko didazuela. Harro nago eraiki dudanaz, bai familia eta lagunarte mailan, baita euskal kultura eta gizarte mailan ere. Ezin hobea izan dut bizitza, eta eskertua nago guztiz».

Joan Mari Torrealdairi Euskal Herriko Unibertsitateak esker onez

Torrealdairen heriotzaz idatzi du UPV/EHUko Jon Zarate Sesmak

2020-08-03

Getze Ibargoitin (Nafarroa) lagunartean familiarekin harrapatu nau Joan Mariren heriotzaren berriak. Bi emozio batu dizkit albisteak, lehenengo tristura eta gero poza. Tristura handia, minez betetako tristura, hutsunez betetako tristura, euskaltzale guztiok erreferente handi bat galdu dugulako. Tristuran murgildurik ordenagailua piztu dut eta poza sentitu dut. Asteazken arratsaldetik pendiente neukan Euskal Herriko Unibertsitateko Gobernu Kontseiluan Jakin Fundazioarekin elkarlanerako onartu genuen hitzarmena digitalki sinatzea. Uztailaren 29an Joan Marik sinatutako dokumentua daukat pantailan eta
gaurko datarekin (2020ko abuztuaren 1ean) Joan Marirenaren aldamenean sinatu dut. Euskal Herriko Unibertsitatea osatzen dugun guztion izenean, eta errektore den Nekane Balluerkaren ordezkari gisa, sinadura honen bidez gure omenaldi xume eta apala egin nahi diogu Joan Mariri.

Ikasteko baserria utzi nahi izan zuen haurra

Jakin aldizkariari lotuta, bizi osoa eman du Joan Mari Torrealdaik euskal kultura eta pentsamendua sustatzen

2020-07-31

Joan Mari Torrealdai Nabea 1942ko azaroaren 24an jaio zen Foruko Urberuaga auzoko Mosone baserrian. Haurtzaroa bertan igaro zuen, gurasoei baserri-lanetan lagunduz. Txikitatik esan zion aitari berak baserrian aritu beharrean ikasi egingo zuela, herrian zegoen frantziskotarren seminarioko haurrek bezala. 12 urterekin, 1954an, Arantzazuko seminariora joan zen, beraz. Bertan eta Foruan bost urtez humanitate ikasketak egin ostean, filosofiakoak egin zituen Erriberrin eta Arantzazura itzuli zen. Bertan sartu zen Jakin aldizkarian, 1963an.

Joan Mari Torrealdai (1942-2020): "Euskal kulturari ikusgarritasuna ematen saiatu naiz"

Euskal kulturaren eta euskararen modernizazioa sustatzen gakoa izan da Joan Mari Torrealdai. 77 urterekin hil da Usurbilen.

2020-07-31

77 urterekin hil da Joan Mari Torrealdai, gaixotasun luze baten ondorioz. Euskal kultura eta euskara modernizatzeko lan egin du gaztetandik, eta euskal pentsamendua sustatzen buru-belarri aritu da Jakin aldizkarian. Euskaldunon Egunkaria-ren sortzaileetako bat ere bada.

Lorea Agirre Dorronsoro: 'Euskararen Amaiur honetan'

Joan Mari Torrealdairen heriotzaz Lorea Agirre Dorronsoro Jakineko zuzendariak idatzitakoa

Gizarteari lotzen gatzaizkion lekuak bizitzaren zentzuaren berri eman lezake. Joan Mari Torrealdai euskararen eta herriaren aldeko borrokatik lotu zaio herri izan nahi duen gutasun honi. Zehatzago esan, euskalgintza herrigintzaren eraikuntzaren erdigunean jartzetik. Eta hori du bere bizitzaren zentzua, bizi duen lekua.