Aurtengo Jakin jardunaldiak demografia izango du ardatz, etorkizuneko Euskal Herria irudikatzeko. Zaintzaren eta hizkuntzaren auziak aletuko dituzte, datu demografikoei berrirakurketa kritiko bat eskainiz. Erronka demografikoa ezbaian jartzeko prest etorriko da Marta Luxan EHUko soziologia irakasle eta demografian aditua, eta Euskadi Irratiko Jakingunean xehetu ditu arrazoiak.

Uztailaren 7an eta 8an egingo da VIII. Jakin Jardunaldia Usurbilen, datu demografikoetatik abiatuta zaintzen eta hizkuntzaren auziei erreparatzeko. Euskal Herria 2040: demografia, lurraldea, zaintza eta hizkuntza izango du izenburu eta UEUren, Usurbilgo Udalaren eta Jakinen lankidetzaren emaitza da. Demografian oinarrituko den arren, Jakineko zuzendari Lorea Agirrek azpimarratu du "erronka demografikoa deritzon hori benetan erronka den" zalantza ere planteatu nahi dela, ikuspegi kritikoa baliatuz. Euskal Herriaren geroa irudikatzeko ariketa izango da, baina ez irudikatzeko soilik, baizik: "etorkizun hori bizigarriago egiteko formulak proposatu eta pentsatzeko", Agirrek azaldu bezala. Zabalik dago izen ematea.

Lokatza podcast feministak Ondas saria jaso du Malagan. Espainiako Estatuko hizkuntza koofizialen alorreko podcast onenaren Ondas Saria da zehazki eskuratu duena. Jakinek Lokatzan parte hartu duten guztiak eskertu ditu, 50 emakumetik gora izan baitira euren bizipen eta ahotsa eskaini dutenak. Prisa taldeak SER kateko Radio Barcelonaren bidez banatzen ditu Ondas sariak 1954tik, eta aurten lehen aldiz podcasten alorreko sari berezituak eman ditu. 

Euskal Pentsamendua digitalizatzeko proiektuaren baitan argitaratu berri dira EABko bederatzi emakumeren obra idatziak. Julene Azpeitia, Errose Bustintza, Karmele Errazti, Miren Etxabe, Julia Fernandez Zabaleta, Tene Muxika, Polixene Trabudua, Sorne Untzueta eta Elbire Zipitriaren lanak eskuragarri daude Jakinen webgunean orain. Emakume hauen obraren balioaz eta euskal pentsamendua digitalizatzeko proiektuaz aritu da Lorea Agirre zuzendaria, Jakingunean.

Euskal pentsamenduaren transmisiorako proiektu digitalaren atal berri bat osatzen dute EABko bederatzi idazleek. Eskuragarri eta kontsultagarri dago jada Julene Azpeitia, Errose Bustintza, Karmele Errazti, Miren Etxabe, Julia Fernandez Zabaleta, Tene Muxika, Polixene Trabudua, Sorne Untzueta eta Elbire Zipitriaren obra osoa. Lorea Agirrek azaldu duenez,  «lan kualitatibo mardula» da, «apenas egin baita azterketa bibliografikorik garaitsu horretako emakumeen obraren gainean».

Euskal liburugintzaren azterketa soziologikoari ekin zion Joan Mari Torrealdaik 1976an, eta bere heriotzaz geroztik Xabier Eizagirrek hartu du lekukoa. 2019. urteko liburugintzaren azterketa argitaratu berri du eta ondorioen berri azladu du Euskadi Irratiko Jakingunean.