Miren Larrea (Azpeitia, 1970). Ekonomian doktorea da Deustuko Unibertsitatean. Bere ibilbide profesionala lurralde garapenaren inguruan egin du; Deustuko Unibertsitatean ikerlari moduan hasi zen eta ondoren praktikara pasa zen Urola Erdiko garapen agentzian sei urtez. Bi esperientzia horiek uztartuz, 2007az geroztik Orkestra-Lehiakortasunerako Euskal Institutuan ikerlari moduan dihardu, ekintza-ikerketa metodologian sakondu eta Gipuzkoako Foru Aldundiaren herri politiketan erabiliz. Metodologia horren inguruan argitalpen ugari egin du, eta gaur egun International Journal of Action Research aldizkariko editore burua da.
