Ludwig Wittgenstein (1889-1951). Erdi-katoliko, erdi-judu, Vienan jaio eta Ingalaterrara joan zen filosofia ikastera, Russellen eskutik. Lehen Mundu Gerran soldadu austriarra zelarik Tractatus Logico-Philosophicus idatzi zuen. Gero, harat-honat, Austrian, Norvegian, Errusian, Ingalaterran, Irlandan bizi izan zen. Bizitza aberrigabea eramanik ere, abertzaletasuna ideia baten amodioa dela idatzita utzi zuen. Baina halako amodioa Hitlerrek apurtu zuen. Orduan, Austria nazitik ihes eginez, zientziak eta industriak gerra erabakitzen dutelakoan zegoen: gizakien bizitzan garrantzitsuena ez da aurrerapen teknozientifikoa, baizik eta etika, estetika eta errito antropologikoak, hau da, mistikoa.
