2017ak eman duenak balio du hasi berri dugun urteari begiratzeko. Erronkak zehazteko. Horregatik, euskal kulturaren urteko balantzea egiteko eskatu die Jakinek Olatz Beobide, Miren Rubio, Itziar Ugarte Irizar, Jon Eskisabel, Kattalin Miner, Galder Perez, Iratxe Retolaza, Maialen Goñi eta Xabier Landabideari. Gainera, urtea irudietara ere ekarri dute Adur, Aritz Irigoien, Axpi Ilustrazioa, Exprai, Diego Pallés eta Patxi Gallego marrazkilariek.
Olatz Beobidek antzerkiaren eta ikus-entzunekoen esparruaren errealitateaz egiten du gogoeta, sektoreari eta lanbideari lotutako hainbat auziren inguruan: langileen lan baldintzak, euskarazko ekoizpenen zailtasunak, euskal antzerkiaren dokumentazio zentroaren eta artistaren estatutuaren egitasmoak, euskal zinemaren egoera, telebistako euskarazko ekoizpena eta formatu berrien erronka...
Miren Rubiok 2017ko zenbait urtemuga eta gertakari aukeratu ditu gure burua irudikatzeko ditugun ikur eta lekuez jarduteko: Guernica koadroa, Guggenheim museoa, Arriaga antzokiaren Obabakoak ekoizpena, Kukai dantza taldea... Adibide horien bidez identitatea eraikitzeko ditugun zailtasun eta moduak uzten ditu agerian. Konplexuak eta aukerak.
Itziar Ugartek gogoeta egiten du euskal kulturgintzari buruz, urtean zehar izandako hainbat gertakarik akuilatuta: kulturaren transmisioaz, memoriaren eta errelatuaren auziaz, euskal kulturak jasaten dituen mespretxuaz eta euskarak eta kulturgintzak nazioa biltzeko izan dezaketen garrantziaz.
Euskal hedabideak urterokotasunaren urduritasuna gainditzeko lagunduko dien itun bila ari dira administrazio publikoekin, eta mahai iraunkorra finkatuta dago GFArekin eta HPSrekin. Hainbat adostasun ere lortu dituzte hedabideek. Hurrengo hilabeteak giltzarri izango dira 2019tik aurrera beste lankidetza esparru berri bat eraikitzeko. Artikulu honetan azaltzen dira lortutako adostasunak eta konbentzimenduak.
