Gure gizartean nagusi den maitasun-ideologiaren irakurketa kritiko bat abiapuntu harturik eta ideologia hori auzitan jartze aldera, maitasuna erdigunetik kanpo kokatzeko dekalogo moduko bat aurkezten da. Horrela, besteak beste, pentsamendu monogamoaren aurrean apostasia egiteko, emakume ezkongabeen historia berreskuratzeko, maitasun ez-erromantikoa fikzionatzeko, harreman afektiboen intrantsitibotasunaren ideia ereiteko edo harremanen eta espazioen artekotasunaz pentsatzeko gonbidapena egiten da.
Gai nagusia sailean, maitasunaren ideologiak gure buruak, harremanak eta etxe eta kaleak nola eraikitzen dituen aztertu dute Lorea Agirre Dorronsoro, Mari Luz Esteban, Zaloa Basabe Gutierrez, Oihane Ruiz Menendez, Irati Mogollon Garcia, Leire Milikua Larramendi, Ula Iruretagoiena Busturia, Jone Arrazola Maiztegi, Nora Salbotx Alegria, Jone Miner Aginaga eta Abaraska Etxebizitza Kooperatiboak. Bestalde, Haritz Azurmendi Arruek Joxe Azurmendiren nazio ideia aztertu du.
