«Zer jakinen dute gazteek?». Ez omen zaie ezer inporta, ez omen daude gizarteko gaiei buruz erabakiak hartzeko prest. Zer izanen dute, beraz, esateko? Bada, badute esateko ugari. Gizarteaz, gazteriaz eta horren parte hartze politikoaz. Horren inguruko analisi zabala egiten dute EGIko Aitana Agirrek, LGTBIQ+ mugimenduko Iñigo Etxezarretak, Ernaiko Izar Hernandok, GKSko Unai Martinezek eta mugimendu feministako Naiara Rodriguezek.
Gai nagusia sailean, gazteen parte hartze politikoari buruzko ikerketa aurkeztu dute EHUko Parte Hartuz ikerketa taldeko Ane Larrinaga Renteria, Iker Iraola Arretxe, Onintza Odriozola Irizar, Mila Amurrio Velez, Julen Zabalo Bilbao eta Maddalen Epelde Juaristik. Bestetik, Andoni Olariaga Azkaratek egungo krisi garaion testuinguru historiko, filosofiko eta politikoa aztertu du; eta Aitana Agirre, Iñigo Etxezarreta, Izar Hernando, Unai Martinez eta Naiara Rodriguez gazteen konpromiso politikoaz aritu dira.