Inork espero ez zuen forma hartu du 55. Durangoko Azokak. 50. edizioan balio immaterialaren inguruan egindako ikerketa gogoan, aurtengoaren inplikazioez hausnartzen da Azokaren aurreko, bitarteko eta ondorengo egunak oinarri hartuta.
Gai nagusia sailean, 2020ko kultur balantzea egin dute Katixa Agirre Miguelez, Alberto Barandiaran Amillano, Olatz Osa Zubia, Xabier Landabidea Urresti, Dani Fano, Eider Eibar Zugazabeitia, Josevisky, Nerea Unanua Otxoantezana, Edurne Azkarate, Xabier Gantzarain, Igor Elortza, Katti Pochelu eta Castillo Suarezek. Liburuak sailean, 2018ko euskal liburugintza aztertu du Xabier Eizagirre Gesalagak, Joan Mari Torrealdaik 1976an abiatutako ikerketa lerroari segida emanez.
