ZUZENEAN: 'Maitasuna politikoa da' Jakin Jardunaldia
'Maitasuna politikoa da' Jakin Jardunaldia uztailaren 11n eta 12an Usurbilen antropologo, arkitekto eta hezkuntza adituekin
Maitasunaren ideologiak gure buruak, gure harremanak eta gure etxe eta kaleak nola eraikitzen dituen aztertzen dabil aurtengo Jakin Jardunaldiak. Horretarako, antropologoak, arkitektoak eta hezkuntza arloko adituak elkartuko ditu Usurbilen, uztailaren 11n eta 12an. Jakin, UEU eta Usurbilgo Udalaren elkarlanari esker antolatu da jardunaldia hirugarrenez eta 60 lagunek baino gehiagok hartuko dute parte, lekuak beteta izaki.
Maitasuna deseraiki eraikitzeko
«Maitasuna politikoa da ideologia bat delako eta bizikera eta bizileku eredu jakin batzuk eraikitzen dituelako», ziurtatu du Lorea Agirre Dorronsoro Jakineko zuzendariak eta jardunaldiko hizlariak. «Maitasuna ulertzeko dugun moduak gizarte harreman eta gizarte antolamendu jakin batzuk eratzen ditu eta horiek berekin dituzte botere harremanak eta menderakuntza moduak. Harremanen arkitektura horrek guztiak bere hirigintza eta bere arkitektura ditu». Horregatik, proposamena: «Ikus dezagun nolakoa den maitasunaren ideologiaren eraikuntza eta sortzen duen arkitektura. Eta saia gaitezen ikusten ea maitasuna beste modu batez ulertzeak bizikera eta bizileku bizigarriagoak eta berdinzaleagoak eraikitzea ekar lezakeen».
Hain zuzen ere, lehen egunean, Lorea Agirre Dorronsoro arduratu da jardunaldiari sarrera orokorra egiteaz. Ikuspegi antropologiko batetik, maitasunaren ideologiaren oinarriak aletu ditu, horiek sortzen dituzten gizarte egiturak agerian uzteko. Honekin batera, Jone Arrazola Maiztegi antropologoak urbanismo habitatuaz hitz egingo du, emakumeak espazio publikoan nola harremantzen diren azaltzeko.
Oihane Ruiz Menéndez eta Leire Milikua Larramendi arkitektoek espazioari lotuago jardun dute. Lehenik, maitasuna ulertzeko modu jakin batek hiria nola antolarazten duen utzi du agerian Ruiz Menéndezek, hiritarren mendekotasuna ere errotzen duela oroitarazteko. Bigarrenik, desiraren eta sexuaren ertzetik begiratu dio espazioari Milikua Larramendik. Gorputzaren eta espazioaren harremanaz jardun du, desira eta sexualitatea espazioan nola baimendu eta ezkutatzen den hausnartuz.
Ideia horiek praktikara eraman dituzten ekintzaileen lekukotzak jaso ditu ondoren jardunaldiak. Herri hezitzaileen Elizondoko esperientzia ezagutzera eman du Nora Salbotx Alegria NUPeko hezkuntza irakasleak. Ula Iruretagoiena Busturia EHUko irakasle eta arkitektoa, bestalde, Bakioko udal plangintza parte hartzaileaz aritu da, kolektiboan eta afektibitatean oinarritutako hirigintza azaltzeko. Jone Miner Aginaga Usurbilgo Udaleko arkitektoak herriko Txirikorda belaunaldien arteko bizikidetza sustatzeko etxebizitza proiektua aurkeztu du, besteak beste.
Uztailaren 12an Mari Luz Esteban Galarzak, maitasunaren ideologian aditu nagusietakoa den antropologoak, berriz, maitasunaren ideologia deseraiki eta erdigunetik ateratzea planteatuko du, bestelako balioak erdigunera ekartzeko, adiskidetasuna edo justizia nola, eta horien baitan gizartea berrantolatzea proposatuko du.
Azkenik, Donostiako Abaraska kolektiboak tailerra eskainiko du etxebizitzaren eredua ezbaian jartzeko.
PROGRAMAZIOA
UZTAILAREN 11, OSTEGUNA
09:15-09:30 Ongietorria
09:30-10:15 Lorea Agirre Dorronsoro (Jakineko zuzendaria): Maitasunaren ideologiaren eraikuntzak eta deseraikuntzak
10:15-11:00 Jone Arrazola Maiztegi (antropologoa): Habitatzen ditugun eta gaituzten kaleak
11:00-11:30 Kafe tartea
11:30 Oihane Ruiz Menéndez (arkitektura feministako ekintzailea): Maitasunaren ideologia eta hirigintzaren arteko lotuneak
12:15-13:00 Leire Milikua Larramendi (arkitektoa): Arkitektura, desira eta sexualitatea
13:00-13:30 Saio irekia
13:30-15:00 Bazkaria
15:00-17:00 Esperientzien plaza: Elizondo, Bakio, Usurbil
Nora Salbotx Alegria (NUPeko hezkuntza saileko irakaslea): Umeak herriak eraikitzen (Elizondo)
Ula Iruretagoiena Busturia (hirigilea eta EHUko irakaslea): Transbertsalitatea eta afektuak udalerri plangintzan (Bakio)
Jone Miner Aginaga (Usurbilgo udal arkitektoa): Txirikorda, belaunaldi arteko etxebizitza komunitarioa (Usurbil)
UZTAILAREN 12a, OSTIRALA
09:00-09:45 Mari Luz Esteban Galarza (antropologoa): Maitasuna erdigunetik kanpo
09:45-10:30 Abaraska kolektiboa: Etxebizitza eredua auzitan jartzen (Donostia)
10:30-12:00 Tailerra eta kafea: Etxebizitza parekidea eta kooperatiboa nola eta nondik?
12:00-13:00 Partekatzeko saioa
13:00-13:30 Bea Egizabal Ollokiegi: Klownklusioak
