Asisko Urmeneta (Iruñea, 1965). Irudigilea da. Komikia, ilustrazioa, marrazki bizidunak, prentsako karikatura eta abarretatik ateratzen du bizimodua. Hainbat proiektu kolektiboren sustengatzailea da: Napartheid, Marrazkirri, Absurde, Zazpiak Batman, Gartxotekimena, H28, ZAP Art! Hainbat zikilimarro eta artikuluz gain, honako komiki-album hauek argitaratu ditu: Erraondo (TT komikiak, 1991), I am Pellot, Biba Festa! (Argia, 1996; Koxemari Larrearekin batera), Gartxot (Argia, 2003; MKO eta Jokin Larrearekin batera), Okatxu (Argia, 2010; Mattin Irigoien eta Adurrekin batera). Hainbat sari jaso ditu nazioartean: Kuban (1991), Korsikan (2003), Australian (2013), Frantzian (2014). Dudako merituen artean, Beste Aldean bizi da.
