Kultura, hitzarmen bila

'Gogoetaren plazan' esandakoen sintesiaz gainera, Durangoko Azokaren balio immaterialaz Xabier Landabideak eta Nerea Mujikak egindako azterketa ere badakar zenbaki berriak. Durangoko Azokak hizkuntzan, kulturan, identitatean eta transmisioan ze eragin duen ikertu dute.

Joan Mari Torrealdaik, aurreko urteetan egindakoaren ildo beretik, 2014an euskaraz argitaratutako liburuen azterketa aurkezten du. Honako alderdi hauek landu ditu: lehenik, liburu produkzioaren zifren iturriak; bigarrenik, argitalgintzari dagokionez, liburu ekoizleen izaera eta aniztasuna, argitaletxe emankorrenen aipamena eta kanpoko eta bertoko argitaletxeen ekoizpenaren konparaketa; hirugarrenik, argitalpenaren zenbakien inguruan, argitaratutako tituluen zifrak eta nobedadeak eta berrargitalpenak; eta, azkenik, gai multzoen sailkapenari buruzko datuak eta azterketa.